09 Ноябрь 2024
ТАҶЛИЛИ РӮЗИ КОРМАНДОНИ МИЛИТСИЯ ДАР НОҲИЯИ ЗАФАРОБОД
Санаи 8 ноябри соли 2024 дар толори Қасри фарҳанги ноҳияи Зафаробод бо иштироки Раиси ноҳия Исмоилзода Зуфар Муртазохон, роҳбарони мақомоти ҳифзи ҳуқуқ, масъулини мақомоти иҷроияи маҳаллии ҳокимияти давлатӣ, роҳбарият ва кормандони Шӯъбаи Вазорати корҳои дохилии Ҷумҳурии Тоҷикистон дар ноҳияи Зафаробод, собиқадорони мақомоти милитсия ва фаъолони ноҳия маҷлиси тантанавӣ бахшида ба Рӯзи кормандони милитсия баргузор гардид.
Чорабинӣ бо ворид гардидани парчами давлатӣ ва садо додани Суруди милли оғоз ёфт. Нахуст Раиси ноҳия Исмоилзода З.М. ҳайати шахсӣ ва собиқадорони мақомоти корҳои дохилиро бо иди касбӣ муборакбод намуд. Ӯ изҳор дошт, ки саҳми кормандони Шуъбаи Вазорати корҳои дохилии ноҳия дар ҷорӣ намудани тартиботи ҷамъиятӣ, пешгирии ҳуқуқвайронкунӣ, таъмини суботи сиёсӣ ва мубориза бар зидди ҷинояткорӣ басо арзишманд ва назаррас аст. Таъкид гардид, ки расидан ба Истиқлоли давлатӣ дар таърихи милитсия саҳифаи нав кушод ва шароит фароҳам овард, ки кормандони ин ниҳод бо дарки баланди худшиносии миллӣ ва ватандӯстӣ баҳри ҳимояи ин неъмати гаронбаҳои давлату миллат вазифаи муқаддасу ҷонӣ — ҳимоя ва ҳифзи Ватани азизамонро сарбаландона ба ҷо меоранд.
Сардори ШВКД дар ноҳия подполковники милитсия Идизода Баҳодур кормандони шуъба ва собиқадорони соҳаро табрик намуда, дар иҷрои вазифаи масъулиятнокашон комёбиҳо орзу намуд.
Раиси Шӯрои собиқадорони Шуъбаи ВКД Ҷумҳурии Тоҷикистон дар ноҳия подполковники мустаъфӣ Сӯфиев Хокиро кормандон ва собиқадорони мақомоти корҳои дохилиро бо иди касбӣ табрик намуд. Сипас роҳбарият, кормандон ва собиқадорони ШВКД дар ноҳия бо мукофотҳои соҳавӣ, сипоснома ва тӯҳфаҳои мақомоти иҷроияи ҳокимияти давлатии ноҳия қадршиносӣ гардиданд.
Барномаи фарҳангӣ бахшида ба санаи ҷашнӣ табъи иштирокдорони чорабиниро болида намуд.
ДАФТАРИ МАТБУОТИ РАИСИ НОҲИЯИ ЗАФАРОБОД
