09 Март 2019

Санаи 7 марти соли равон Рӯзи Модар дар толори Қасри фарҳанги «Зафар» бо иштироки бонувони фаъоли ноҳияи Зафаробод таҷлил гардид.
Дар маҷлиси тантанавӣ намояндаи мақомоти иҷроияи ҳокимияти давлатии вилояти Суғд, мудири шуъбаи ҳифзи иҷтимоии аҳолии вилоят Исомаддинзода С.А. аз номи Раиси вилоят муҳтарам Раҷаббой Аҳмадзода ва раиси ноҳия Ашурзода Р.Р. аз номи мақомоти иҷроияи ҳокимияти давлатии ноҳия иштирокдорони чорабиниро табрику таҳният намуданд. Намояндаи мақомоти иҷроияи ҳокимияти давлатии вилоят ва раиси ноҳия 4 нафар фаъолзанон-собиқадорони меҳнати ноҳияро аз номи Раиси вилояти Суғд аёдат намуда, тӯҳфаҳои хотиравиро супориданд. Ҳамчунин дар чорабинӣ ба 330 нафар собиқадорони меҳнат, фаъолзанони ноҳия, ки дар соҳаҳои гуногуни хоҷагии халқ кору фаъолият менамоянд, тӯҳфаҳои хотиравии мақомоти иҷроияи ҳокимияти давлатии ноҳия супорида шуд.
Дар саҳни идгоҳ намоиши ҳунарҳои мардумӣ, маҳсули дасти занону духтарони ноҳия ба марази тамошои иштирокдорон гузошта шуд.
Барномаи бахши фарҳанги ноҳия, ки аз суруду таронаҳо дар васфи Ватан-Модар, рақсҳои ҷаззобу дилнишин, саҳнаҳо аз рӯзгори модарони тоҷик мураттаб гардида буд, ба ҳусни чорабинӣ ҳусни хоса бахшид.
Сокинони ноҳия бо шукргузорӣ аз сиёсати имрӯзаи Ҳукумати мамлакат таҳти роҳбарии Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ифода намудани рӯҳияи баланди идона ҷашни Рӯзи Модарро истиқбол намуданд.
Шуъбаи рушди иҷтимоӣ ва робита бо ҷомеаи дастгоҳи раиси ноҳияи Зафаробод