Наврӯзи марзбонони Ватан

29 Март 2021

Тантанаҳои ҷашни Наврӯзи оламафрӯз  ба  кишвари азизамон фаро расида, ин ҷашни  фархундаи миллиро ҳар як сокини мамлакат  бо сарфарозӣ истиқбол мегирад.

Бо ибтикори Кумитаи иҷроияи ҲХДТ дар ноҳияи Зафаробод дар комендатури сарҳадии Зафаробод ҷашни Наврӯз ташкил карда шуда, ба сарбозону марзбонони шуҷоъи Ватан дастурхони наврӯзӣ ташкил карда шуд. Дар маросими тантанавии ҷашнӣ табрикоти раиси Кумитаи иҷроияи ҲХДТ дар вилояти Суғд аз ҷониби намояндаи КИ ҲХДТ дар вилоят Зоҳидов Фаррух ба хизматчиёни ҳарбӣ расонида шуд. Ҳамчунин раиси кумиҷроияи ноҳиявии ҲХДТ Шарифзода Туйғун, раиси шурои собиқадорни ҷангу меҳнат Рустамов Заҳриддин , вакили Маҷлиси вакилони халқи ноҳия Абдураҳмонзода Малоҳат сарҳадбонони диловари марзи кишварро ба  фарорасиии Наврӯзи ҷаҳонӣ шодбош намуданд. Барномаи омоданамудани ТИ “бахши фарҳанги ноҳия” ба чорабинӣ ҳусни хоса бахшид. Аз чониби кумитаи иҷроияи ҲХДТ дар ноҳия ба китобхонаи комендатура китобҳои тозанашр тақдим карда шуд.

Табрикоти Раиси ноҳияи Зафаробод муҳтарам Ашурзода Раҷаб Рӯзӣ бахшида ба Ҷашни байналмилалии Наврӯз

21 Март 2021

Ҳамдиёрони гиромӣ!

Имрӯз кулли мардуми Тоҷикистони азиз, аз ҷумла сокинони сарбаланду зафарманди ноҳияи Зафаробод ҷашни хуҷаставу фархунда, Наврӯзи Аҷамро дар шароити сулҳу ваҳдати комил, суботи сиёсӣ бо самимияти хосаву нишоти беандоза таҷлил менамоянд.

Дар оғози ин тантанаҳо тамоми мардуми сарбаланди кишвар аз ҷумла сокинони ноҳияро бо Иди Наврӯзи оламафрӯз самимона табрику шодбош гуфта, рӯзгори ободу осуда, сарбаландӣ ва саодати ҳамешагиро таманно мекунам.

Наврӯз дастоварди таърихии миллати тоҷик буда, дар даврони соҳибистиқлолии Тоҷикистони азиз бо талошҳои пайвастаи Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон арзишу манзалати хоса пайдо намуд.

Шинохти манзалати Наврӯз дар он аст, ки аз ҷониби созмони умумиҷаҳонии Юнеско ин ҷашн ҷаҳонӣ гардид.

Таҷлили Наврӯзро аҷдодони мо бо суннатҳои барҷаста истиқбол намуда, бо нерӯи идона корҳои созандагиву бунёдкориро вусъат медоданд. Ҳамчунин яке аз фазилатҳои ҷашни Наврӯз ҳамдиливу сарҷамъии аҳли ҷомеа ва хушҳоливу хурсандии хурду бузург маҳсуб меёфт.

Сокинони ноҳияи Зафаробод низ арзишу эътибори ин ҷашни мардумиву миллии Наврӯзро қадр намуда, ҳамасола онро шукӯҳманду ботантана таҷлил менамоянд.

Имрӯз ноҳия рӯҳияи наврӯзӣ дорад. Дар ҷамоатҳои шаҳраку деҳоти ноҳия корҳои ободониву бунёдкорӣ бо мақсади сазовор таҷлил намудани ҷашни 30-солагии Истиқлоли давлатии Ҷумҳурии Тоҷикистон бо маром идома дошта, мардуми сарбаланди ноҳия бо дарки баланди масъулиятшиносиву меҳанпарасти ин санаи таърихиро бо дастовардҳои назаррас истиқбол мегиранд.

Бо шарофати сиёсати хирадмандонаю созандаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ва дастуру раҳнамоиҳои Ҳукумати мамлакат имрӯз кишвари азизи мо - Тоҷикистон ба марҳилаи нави рушд ворид гаштааст.

Ҳамдиёрони азиз!

Ҳар қадар, ки ҷашни Наврӯзро бо шодию фараҳ ва сазовор таҷлил намоем ҳамон қадар файзу нусрат ва баракотро насиб хоҳем гашт.

Бо чунин ниятҳои нек бори дигар ҳамаи Шумо сокинони шарафманди ноҳияро бо фарорасии Наврӯзи фаррухқадам ва оламафрӯз самимона муборакбод гуфта, бароятон хушиҳои рӯзгор, шукуфоиву нусрат, нишоту комронӣ орзу мекунам.

Бигзор хонадони ҳар як сокини кишвар ва ноҳия пурнеъмату файзбор бошад!

Наврӯз иқболи нав, нерӯи нав, афкори навин, руҳияи болидаю созандагӣ ба ҳар яки шумо эҳдо намояд!

Ҷашни Наврӯз муборак ҳамдиёрони азиз!

Табрикоти Раиси ноҳияи Зафаробод Ашурзода Раҷаб Рӯзӣ бахшида ба Рӯзи матбуот

11 Март 2021

Ҳамдиёрони азиз!

Дар ҷаҳони муосир  нақши воситаҳои  ахбори омма барои расонидани иттилоъ ва таҳлилу баррасии масъалаҳои мубрами ҷомеа назаррас буда, воситаи ахбори омма чун як рукни муҳими сиёсӣ ва маънавии ҷомеа дар таҳкими асолати миллӣ, давлатдорӣ, ҷаҳонбинии мардум ва пойдории адолату воқеият нақши бориз дорад.

Асосгузори сулҳу Ваҳдати милл-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барҳақ зикр намудаанд: «Дар шароити мураккаби ҷаҳонишавӣ вазифаи  шабакаҳои иттилоотӣ зиёд гардида, масъалаҳои тарғиби фарҳанги миллӣ, расму ойинҳои мардумӣ ташвиқи андеша ва тафаккури миллӣ, тарбияи насли ояндасоз, риояи меъёрҳои забони давлатӣ ва ҳифзу асолати тозагии он рисолати муҳими воситаҳои ахбор ба шумор меравад».

Бояд зикр намуд, ки бо шарофати Истиқлоли давлатӣ шароитҳои беҳтарини фаъолият барои кормандони васоити ахбори омма муҳаё гардида, имрӯз кормандони ин соҳа -рӯзноманигорони касбӣ ва хабарнигорони ҷамоавӣ метавонанд озодона рисолати касбии хешро ба ҷой оваранд.

Имрӯз дар ноҳия рузномаи «Зарбдор» фаъолият менамояд, ки инъикосгарӣ набзи зиндагии сокинони ноҳия  мебошад. Чандин сол аст, ки ходимони рӯзномаи мазкур  ба мисоли  Аббос Иброҳимов, Малика Қаюмова, Ҷонмурод Муродбеков барин мутахассисон бо масъулияти баланд дар нашри рӯзнома саҳм мегузоранд. Истифода аз маҳорати касбӣ ва таҷрибаи соҳавӣ мактаби рӯзноманигории хешро ташкил кардаанд.

Бо истифода аз фурсати муносиб аҳли қаламкашону матбуотчиёни ноҳияро ба муносибати Рӯзи матбуот самимона табрик менамоям. Бароятон сарбаландӣ, саодати рӯзгор ва дар таҳкими сулҳу Ваҳдат ва  истиқлоли кишвар тавассути расонаҳои хабарӣ комёбиҳо таманно менамоям.

Иди касби муборак!