1 сентябр - Рӯзи дониш

01 Сентябрь 2025

ПАЁМИ ТАБРИКИИ

РАИСИ НОҲИЯИ ЗАФАРОБОД МУРОДЗОДА МУҚИМ ҚАЮМ

БА МУНОСИБАТИ РӮЗИ ДОНИШ

Устодону омӯзгорони муҳтарам!

Хонандагони азиз!

Дар оғози соли таҳсил таҷлил намудани Рӯзи дониш ба яке аз анъанаҳои неки умумимиллӣ табдил ёфтааст. Якуми сентябри ҳар сол кӯдакони хушбахти замони истиқлол ба остонаи муассисаҳои таълимӣ қадам мегузоранд ва ба омӯзиши саводу дониш, одобу ахлоқ ва илму маърифат оғоз менамоянд.

Инак, пас аз таътили тобистона таълимгоҳҳои ноҳияамон ба Шумоён оғӯши худро боз намуданд ва соли нави таҳсили 2025-2026 оғоз гардид. Аз ин лиҳоз, пеш аз ҳама кулли мардуми ноҳия, бахусус муаллимону шогирдони тамоми таълимгоҳҳои ноҳияро ба муносибати оғози соли нави таҳсил, Рӯзи дониш ва ҷашни 34-солагии Истиқлоли давлатии Ҷумҳурии Тоҷикистон, ки баъди чанд рӯз таҷлил хоҳем кард, табрик намуда, ба аҳли мактабу маориф саломативу хушбахтӣ ва комёбиҳо орзу менамоям.

Муқаддастарин боргоҳ барои ҳар як фарди ҷомеа мактаб аст ва шогирдон илму маърифатро маҳз дар ин макон меомӯзанд. Дар ҳақиқат Рӯзи дониш идест, ки ҳамеша хурду калонро ба ҳаяжон меоварад ва нафареро пайдо намудан мумкин нест, ки қадамҳои нахустини худро ба сӯи мактаб намонда бошад, лаҳзаҳои занги аввал ва муаллими аввалини худро дар хотир надошта бошад. Ин рӯзи муборакро ҳар сол тамоми устодону шогирдон бо як шаҳомати хос ҷашн мегиранд.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар замони соҳибистиқлолии кишварамон соҳаи маорифро яке аз самтҳои афзалиятноки сиёсати иҷтимоӣ, таҳкими давлат ва наҷоти миллат арзёбӣ намудаанд. Ҳукумати Ҷумҳурии Тоҷикистон ба омӯзгорон ва соҳаи маориф ҳамарӯза таваҷҷуҳи хоса зоҳир мекунад ва ин ғамхорӣ нисбати онҳо ба хотири рушду такомули маорифи кишвар, боло бурдани сифати таълим, ворид шудан ба фазои ҷаҳонии таҳсилот, ба шароити замона мутобиқ намудани мазмуну мундариҷаи таълим, тарбияи мутахассисони асил барои ҷомеа мебошад.

Мақомоти иҷроияи ҳокимияти давлатии ноҳияи Зафаробод якҷоя бо воҳидҳои сохтории худ дар ташаккули соҳаи маориф ва пешрафти таълиму тарбия корҳои зиёдеро ба анҷом расониданд. Соли ҷорӣ ҳамаи биноҳои таълимии мактабҳои ноҳия дар ҳамкории Мақомоти иҷроияи маҳаллии ҳокимияти давлатӣ бо кумитаҳои падару модарон, сарпарастон ва соҳибкорони маҳаллӣ аз таъмири хушсифат бароварда шуданд. Ҷиҳати таъмини муассисаҳои таълимии ноҳия бо мизу курсиҳо ва лавозимоти муосири таълим корҳои муайян ба сомон расонида шуд. Алҳол дар ноҳия 25 муассисаи таълимӣ, аз ҷумла 22 мактаби таҳсилоти миёнаи умумӣ, 2 литсей, 1 гимназия фаъолият менамоянд. Дар муассисаҳои таълимии ноҳия 17 ҳазору 825 нафар ҷавонону наврасон таҳсил мекунанд ва ба онҳо 1090 нафар омӯзгорон таълиму тарбия медиҳанд, ки 728 нафари онҳо занҳо мебошанд. Соли таҳсили сипаришуда 869 нафар ҷавонон соҳиби номаи камол гардиданд, ки шумораи зиёди онҳо ба мактабҳои олии мамлакат, коллеҷу литсейҳои касбӣ дохил шуданд. Аз 60 нафар довталабони Квотаи Президентӣ 17 нафар, аз ҷумла 9 нафар духтарони болаёқат тибқи Квота ба муассисаҳои олию касбӣ дохил шуданд. Инчунин, 20 нафар хатмкунандагони муассисаҳои таълимии ноҳия ба мактабҳои олии Федератсияи Россия дохил шуданд.

Бояд зикр намуд, ки баҳри ҳарчи бештар ба таҳсили ибтидоӣ ва миёнаи касбӣ фаро гирифтани наврасону ҷавонон ва баланд бардоштани дараҷаи касбомӯзӣ дар ноҳияи Зафаробод як коллеҷи омӯзгорӣ, як коллеҷи политехникӣ ва ду литсейи касбии техникӣ фаъолият менамоянд. Фаъолияти пурсамари хатмкардагони ин зинаи таҳсилот дар  пешрафти ҳаёти иқтисодиву иҷтимоии ноҳия нақши худро дошта, таваҷҷуҳи корхонаю муассисаҳо ба мутахассисони омоданамудаи ин зинаи таҳсилот бештар гардидааст.

Таъминоти муассисаҳои таълимӣ бо кадрҳои омӯзгорӣ дар меҳвари сиёсати Ҳукумат қарор дорад. Ҷолиби қайд аст, ки то имрӯз 25 нафар кадрҳои ҷавони соҳаи омӯзгорӣ тибқи роҳхати Вазорати маорифи Ҷумҳурии Тоҷикистон дар ноҳия ба кор қабул карда шуданд.

Мақомоти иҷроияи ҳокимияти давлатии ноҳия баҳри амалӣ намудани ислоҳоти соҳаи маориф ва иҷрои Барномаҳои Ҳукумати Ҷумҳурии Тоҷикистон оид ба соҳаи маориф, инчунин дастуру супоришҳои Пешвои миллат муҳтарам Эмомалӣ Раҳмон, ки зимни суханрониашон ба муносибати Рӯзи дониш ва дарси сулҳ дар Донишгоҳи байналмилалии сайёҳӣ ва соҳибкории Тоҷикистон санаи 30 августи соли ҷорӣ баён доштаанд, тамоми чораю тадбирҳоро меандешад.

Бори дигар кулли аҳли маорифи ноҳия, хонандагон ва ҳамдиёрони азизро ба муносибати оғози соли нави таҳсил ва Рӯзи дониш, инчунин, 34-солагии ҷашни бузурги Истиқлоли давлатӣ самимона табрик гуфта, ба ҳар яки шумо – ҳозирини гиромӣ – барори кор ва ба хонандагони муассисаи таълимӣ хониши аъло орзу менамоям.

Ҳамеша саломату хушбахт бошед!

ОЗМУНИ МАНСАБҲОИ ХОЛИИ ХИЗМАТИ ДАВЛАТӢ

26 Август 2025

МАҚОМОТИ ИҶРОИЯИ ҲОКИМИЯТИ ДАВЛАТИИ

НОҲИЯИ ЗАФАРОБОД БАРОИ ИШҒОЛИ МАНСАБҲоИ ХОЛИИ МАЪМУРии хизмати давлатӢ ОЗМУН ЭЪЛОН МЕНАМОЯД

Воҳидҳои сохтории мақомоти

иҷроияи ҳокимияти давлатии ноҳия

1. Сармутахассиси Раёсати кишоварзӣ - 1 ҷой, маоши мансабӣ - 1902,40 сомонӣ;

2. Сармутахассис котиби мақомоти васояту парасторӣ МИҲД-и ноҳия - 1 ҷой, маоши мансабӣ - 1902,40 сомонӣ;

3. Сармутахассиси бахши бойгонии МИҲД-и ноҳия - 1 ҷой, маоши мансабӣ - 1902,40 сомонӣ;

4. Мутахассиси пешбари бахши дин ва танзими ҷашну маросими мақомоти иҷроияи ҳокимияти давлатии ноҳия - 1 ҷой, маоши мансабӣ - 1554,40 сомонӣ;

Ҷамоатҳои шаҳраку деҳоти ноҳия

5. Сармутахассис-сармуҳосиби (оморчи) Ҷамоати деҳоти Равшан - 1 ҷой, маоши мансабӣ - 1902,40 сомонӣ;

6. Сармутахассис муҳандис-заминсози Ҷамоати деҳоти Равшан 1 ҷой, маоши мансабӣ - 1902,40 сомонӣ;

7. Сармутахассис, муҳандис-заминсози Ҷамоати шаҳраки ба номи Ҳамид Алиев - 1 ҷой, маоши мансабӣ - 1902,40 сомонӣ;

8. Сармутахассис-сармуҳосиби Ҷамоати шаҳраки Зафаробод - 1 ҷой, маоши мансабӣ - 1902,40 сомонӣ;

9. Мутахассиси Ҷамоати шаҳраки Зафаробод - 1 ҷой, маоши мансабӣ - 1218,00 сомонӣ;

10. Сармутахассис муҳандиси заминсози Ҷамоати шаҳраки Меҳнатобод - 1 ҷой, маоши мансабӣ - 1902,40 сомонӣ;

11. Сармутахассиси дин, танзими ҷашну маросими Ҷамоати шаҳраки Меҳнатобод - 1 ҷой, маоши мансабӣ - 1902,40 сомонӣ;

12. Мутахассиси Ҷамоати деҳоти Ҷомӣ - 1 ҷой, маоши мансабӣ - 1218,00 сомонӣ;

Талаботи тахассусӣ

барои ишғоли мансаби сармутахассис

- таҳсилоти олии касбӣ, ихтисоси ба мансаби ишғолшаванда мувофиқ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад;

- 2 сол собиқаи хизмати давлатӣ ё 3 сол собиқаи умумии меҳнатӣ;

- малакаи хуби муошират бо аҳли ҷомеа, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ.

-  малакаи кор бо компютер.

Талаботи тахассусӣ

барои ишғоли мансаби мутахассиси пешбар

-таҳсилоти олии касбӣ, ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад.

- 1 сол собиқаи хизмати давлатӣ ё 2 сол собиқаи умумии меҳнатӣ;

- малакаи хуби муошират бо аҳли ҷомеа, аз ҷумла маҳорати ба роҳ мондани ҳамкорӣ ҳангоми татбиқи манфиатҳои давлатӣ.

-  малакаи кор бо компютер.

Талаботи тахассусӣ

барои ишғоли мансаби мутахассис

-таҳсилоти олии касбӣ, ва ё миёнаи касбӣ ки иҷрои самараноки вазифаҳои мансаби мазкури маъмурии хизмати давлатиро таъмин карда метавонад.

-малакаи кор бо компютер.

Барои иштирок дар озмун

ҳуҷҷатҳои зерин пешниҳод карда мешаванд:

- ариза ба унвони роҳбари мақоми давлатӣ бо шакли дар замимаи 1

пешбинигардида;

- варақаи шахсии баҳисобгирии кадрӣ (бо 2 дона акси андозаи 4х6);

- тарҷумаи ҳол;

- нусхаи ҳуҷҷатҳо дар бораи таҳсилот;

- нусхаи дафтарчаи меҳнатӣ (ба ғайр аз ҳолатҳое, ки шахс собиқаи

меҳнатӣ надорад);

- маълумотнома оид ба вазъи саломатӣ дар шакли 038 УЕ;

- нусхаи гувоҳномаи рақами мушаххаси андозсупоранда;

- маълумот дар бораи даромад ва вазъи молу мулк;

- нусхаи шиноснома;

- нусхаи билети ҳарбӣ (барои шахсоне, ки хизмати ҳарбиро адо

намудаанд);

-маълумотнома оид ба надоштани доғи судӣ

Суроғаи қабули ҳуҷҷатҳо

ноҳияи Зафаробод, кўчаи Исмоили Сомонӣ №37, мақомоти иҷроияи ҳокимияти давлатии ноҳияи Зафаробод, шуъбаи ташкилӣ ва кор бо кадрҳои дастгоҳи раиси ноҳия, телефон:  (8-34-52) 5-21-98, 92 874-36-01, 11-115-55-88

Эзоҳ: Иловапулӣ ба маоши мансабӣ барои собиқаи хизмати давлатӣ ҳар моҳ ба андозаи муқарраргардида пардохт карда мешавад.

Табрикоти раиси ноҳияи Зафаробод Муродзода Муқим Қаюм бахшида ба Иди Қурбон

06 Июнь 2025

Ҳамдиёрони азиз!

Ҳамасола дар саросари Тоҷикистони соҳибистиқлоли мо чун дигар давлатҳои мусулмонии ҷаҳон Иди Қурбон ҳамчун иди аҷдодӣ ва садоқату меҳрубонӣ, ҷиҳати арҷгузорӣ ба арзишҳои башардӯстонаи дини мубини ислом таҷлил карда мешавад. Ин рӯзи муборак барои ҳар як фарди мусулмон иди муътабар ва гиромӣ аст. Зиёда аз 1400 сол ин ҷониб ҳамаи мусулмонони олами ислом ин идро ҳамчун иди хайру саховат, иди некию вафодорӣ, дӯстиву рафоқат қайд мекунанд.

Аз ин лиҳоз, тамоми мадуми ноҳияро ба муносибати фарорасии Иди мубораки Қурбон табрик намуда, тандурустиву сарбаландӣ, файзу баракати зиндагӣ ва рӯзгори нек орзумандам.

Иди Қурбон аз ҷумлаи азизтарин маросимҳои суннатии мардуми мусулмон буда, воқеан ба маромҳои инсондӯстию мурувват ва сулҳхоҳиву меҳрубонӣ бунёд ёфтааст. Аз баракати Истиқлоли давлатӣ имрӯз мардум фаризаҳои асосии иди шарифи Қурбонро озодона ва бемамониат адо менамоянд. Дар баробари ба ҷо овардани аҳкоми ид ба аёдату табрикоти пайвандону наздикон, беморону пиронсолон ва зиёрати марқади гузаштагон рафтан, ба азодорон изҳори ҳамдардӣ кардан ва муҳимтар аз ҳама чи хеле, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳидоят менамоянд, ба дармондагону ниёзмандон, ашхоси камбизоат, ятимону маъюбон хайру эҳсон намудан ба урфияти неки мардуми мо табдил ёфтааст. Зеро ғояи асосии дини мубини ислом эҳтиром кардани инсонҳо ва одамият мебошад.

Пайғамбари ислом ҳазрати Муҳаммад (с) дар як ҳадиси мубораки худ фармудаанд: «Аввал чизе, ки худованди таъоло дар тарозуи амал мениҳад, ахлоқи нек ва саховат аст».

Бузургони адабиёти оламшумули мо бошанд, ба даст овардани дили мӯъминонро ба ҳаҷҷи акбар баробар донистаанд.

Дар арафаи иди шарифи Қурбон тавофи Каъба намудан яке аз рукнҳои асосии дини мубини ислом мебошад. Ҳоло беш аз 7000 нафар сокинони кишвар, ки аз ин 30 нафарашон аз ноҳияи Зафаробод мебошанд бо нияти иҷрои яке аз рукнҳои дини мубини ислом - адои маносиқи ҳаҷ ва зиёрати хонаи Худо ба Маккаи мукаррама ва Мадинаи мунаввара сафар карданд. Умедворем, ки онҳо баъди ҳаҷ бо дилу нияти пок ба Ватан баргашта, дар тарғиби суннатҳои неки ватандорӣ, ободии диёри хеш, одобу ахлоқ ва рафтори ҳамида саҳми босазо мегузоранд.

Бори дигар Иди саиди Қурбонро ба тамоми сокинони ноҳия табрик гуфта, саломатӣ, бахту саодат, барори кор ва ҳамаи хушиҳои зиндагиро орзу менамоям.

Ид муборак, ҳамдиёрони азиз!